Manipur CM-in Covid-19 centre thar hawng

Manipur chief minister N Biren Singh chuan Ningani khan Imphal-a Jawaharlal Nehru Institute of Medical Sciences (JNIMS)-a khum 100 awmna, Covid-19 Block  thar a hawng. 

Block siam thar hma hian JNIMS-ah hian Covid-19 Block pahnihna, khum 145 awmna siam a lo ni tawh bawk. 

CM Biren Singh chuan damdawi lama thawktute chu an state-a Covid-19 darh zel tur venna kawnga theihtawp chhuah chhunzawm zel turin a chah. "Sipaiten ram humhimna tura indonaa theihtawp an chhuah angin; doctor, nurse, paramedical staff leh damdawi lama thawktu dangte chuan hri dona kawnga beihnaah hma an hruai a ngai a ni," a ti. 

Sorkar leh mipuite pawhin medical staff-te thawh rim zia leh an hahzia pawh an hriatpui a ni tih sawiin, CM chuan an harsatna leh mamawhte pawh ngaihtuah sak an nih tur thu a sawi. Hemi rual hian tunah rih chuan thil dang dah ṭha a, hri dona kawnga insawrbing rih a ngaih thu a sawi. 

CM chuan mitin nunna chu a hlu vek a, hei vang hian thawktu lam inthlahdah avangin nunna chan an awm tur a ni lo, a ti. 

Manipur-ah hian Covid-19 kai enkawlna tur khum 2,759 siam a ni tawh. Hri kai hmuh chhuah tawh hi mi 26,534 awmin, an zinga 23,397 chu enkawl dam an ni tawh. Recovery rate hi 87.67% a ni. Hripui thihpui hi mi 318 an awm tawh bawk. 

West Kameng dist-ah vaccine dawng hmasa tur thlang

Arunachal Pradesh-a West Kameng district thuneitute chuan Covid-19 vaccine a awm huna vaccine dawng hmasa turin healthcare worker 1,316 te a thlang tawh.

'District Task Force on COVID-19' meeting neihnaah Deputy Commissioner Karma Leki chuan vaccine hi district chhunga block paliah session 121-a sem chhuah a ni dawn tih a sawi. Hei hian health centre 11, sorkar leh private-te a huam dawn a ni, a ti. Vaccine semchhuah hna hi doctor 42 leh nurse 108-ten an buaipui dawn tih a sawi bawk. 

Meghalaya chief minister Conrad K Sangma chuan Covid-19 a kai tih nimin khan a sawi. 

Sangma chuan hri a kai thu hi a twitter-ah tarlangin, in lamah inenkawl turin a inkhung hrang nghal tih a sawi a, tunhnaia amah nena inhnimhnaihna lo neite chu in-test ve turin a ngen nghal bawk. 

Meghalaya cabinet minister pahnih, health minister AL Hek leh urban affairs minister Sniawbhalang Dhar-te chuan October thla khan Covid-19 an lo kai tawh bawk a, mahse enkawl dam an ni ve ve tawh.