Manipur Police-in Arambai Tenggol pawl warning a pe

Manipur tualchhung buainain zual lam a la pan zel a, venghimtu lam pawh buaina chhuak hian a nghawng chhoh ta zel. Tunkar Thawhlehnia khan Meitei kalfawr pawl, Arambai Tenggol chuan police officer leh a ṭhuihhruai-te chu tharum hmanga beiin an ru bo a, he thil thleng avang hian Manipur Police chuan Arambai Tenggol mi leh sa-te chu warning a pe.

Manipur Police chuan thuchhuah siamin, Additional Superintendent of Police, Imphal West leh police dangte chuan February 27 khan beih an tawh thu an sawi. He thil thleng chungchangah hian lungawi lohna lantirin, Nilaini khan Imphal West, Imphal East leh Bishnupur-a police commando-te chuan an ralthuam an dah thla. Police commando-te chuan misual ralthuam kengten an kah laiin an officer-te chuan kah let ve an phal lo niin an sawi.

Manipur Police chuan Addt SP leh a chhungte beih an nih bakah hian, an in leh lo bakah an buangruate suasam sak an nih thu an sawi a, Addt. SP Amit Singh hian danin a phut anga a hna ṭha taka a hlen avanga hetiang beihna a tawk mai hi pawi an ti takzet tih an sawi. Amit Singh leh a thawhpuite hian Imphal West district-a dan leh thupek ken kawh a nih theih nan rim takin hna an thawk tih an tarlang tel bawk. Manipur police chuan Imphal Police station-ah Addt. SP leh a thawhpui laka tharum thawhna thleng leh ruk bo an nih avang hian thubuai an ziah luh thu an tarlang bawk.

Police department chuan mipuite chu thu dik lo thehdarh lo turin an ngen a, Arambai Tenggol chu mipui tana hnawksak zawnga khawsa ṭhin an nih thu leh sorkar hnathawk leh sumdawng lian hnen aṭanga pawisa khawn ṭhinah an puh bawk a ni. "Mipuite chu Manipur Police chuan remna leh muanna a awm theih nan thawhpuiah kan sawm a che u, thu dik tawk lo thehdarh ṭhin chu lo awih mai lo turin kan chah duh che u a ni. Police chuan misual pawikhawih ṭhinte man chhuah an nih theih nan hma a la chhunzawm zel dawn a, hetianga inhnamhnawihte chuan hremna an tuar ngei dawn a ni" tiin an thuchhuahah an tarlang.