Assam : CAA hman tumna AASU leh pawl dang 30-in dodal dawn

All Assam Students Union (AASU) leh state chhunga pawl hrang hrang 30 chuang chuan sorkar laipuiin sawisel hlawh tak, Citizenship Amendment Act, 2019 hman ṭan a tumna chu an dodal dawn tih an sawi. CAA 2019 hian Assam a huam tel a ni.

AASU chuan March 4, Thawhṭanni lo awm turah hian district khawpui zawng zawngah bike rally an nei ang a, CAA dan ziahna copy hal ralna hun an hmang bawk ang. Prime Minister-in Assam a tlawh ni tur, March 8-ah martyrs pangate hriatrengna hun an hmang dawn a, March 9-ah zing dar 6 aṭanga tlai dar 6 thleng chaw ngheiin nawrh an huaihawt dawn bawk a ni. Heng bakah hian AASU chuan district khawpui zawng zawngah CAA duh lohna lantir nan Satyagraha neih a nih tur thu an sawi bawk, a neih ni leh hun tur chu an la tichiang lo thung.

AASU hruaitute leh hnam hrang hrang 30 hruaitute chu Ningani khan Guwahati-ah inhmukhawmin an state chhung dinhmun sawihona an nei. Inhmuhkhawm hi AASU president Nilutpal Sarma chuan kaihruai a ni. AASU chief advisor Samujjal Bhattacharya chuan thuthar thehdartute a kawnmna ah an inhmukhawm chuan CAA dodalna lantirna chu Assam leilung fate tan a ṭha dawn zawka an ngaih avangin ṭhulh a nih thu a sawi.

Samujjal Bhattacharya, AASU chief advisor chuan Supreme Court-in CAA chungchang a ngaihtuah mek laia sorkar laipui lamin hman ṭan a tum mai chu mak an tih thu a sawi a, hmarchhak state dang Inner Line Permit (ILP) leh Sixth Schedule neihnaah CAA chu hman a ni ve dawnlo tih sawiin, hetiang a nih laia Assam a hman a ni bik tur chu an hriatthiam loh bakah an duh lo takzet tih a sawi a ni.