Arunachal : Activist-ten project ṭhenkhat titawp turin sorkar an ngen

North East Human Rights (NEHR) chuan Arunachal Pradesh a tui khuahna tur project hrang hrang chungchang ngaihtuah ṭha leh turin sorkar an duh, heng project-te hi titawp tura an duh thu an sawi.

Arunachal sorkar hian nikum August thla khan an state-a tui khuahna turin Memoranda of Agreements (MoAs) sawm pahnih lai a lo ziak tawh a ni.

Activist-te hian Arunachal chu tuikhuah lian tak tak awm nan a him loh thu an sawi a, mithiam zirchianna chu ṭan chhanah hmangin hetiang tuikhuah hian chhiatna nasa zawk a thlen thei niin an sawi. NEHR chuan mithiamte'n a hlauhawmzia vawi tam tak an sawiin awmzia a neilo chu pawi an ti thu an tarlang.

NEHR chuan Chamoli, Uttarakhand leh North India-a kum 2013 kuma tuilian avanga chhiatna lo thleng tawh tarlangin, nunna chan bakah nungcha leh ramngaw ten heng chhiatna hi an tawrh ve thu an sawi. Sik leh sa inthlak zel avangin tlang sang tak taka vurte chuan tuiral lam a pan zel a, Arunachal Pradesh-a tuikhuah tumna pawh hian nghawng ṭha lo zawk a neih an hlauh thu an sawi.

NEHR chuan Chief Minister hnenah tui khuah a nih hmain Environment Impact Assessment (EIA) ṭha taka kalpui tura an duh thu an thlen a, hemi bakah hian tui khuahin a nghawng tur khuaa chengte nen sawihona neih leh, chhiatna thleng thei laka inven nan inpuahchahna ṭha taka neih an duh thu an thlen bawk.