Meghalaya Congress hruaitute'n Governor Satya Pal Malik an hmu

Meghalaya-a eptu pawl, Congress party hruaitute chuan Ningani khan Governor Satya Pal Malik an hmu a, Inner Line Permit (ILP) system hman thuai an duh thu leh, Meghalaya Residents’ Safety and Security Act (MRSSA) chungchang an sawipui. 

Eptu hruaituten an hmuh hma, Nilaini khan chief minister Conrad Sangma leh Governor-te hian meeting neiin, ILP  leh MRSSA chungchang hi an lo sawidun tawh bawk a ni. Sangma chuan Governor hian union home ministry-ah thlen a lo tiam tih a sawi. 

Congress hruaitute hian Governor hnenah hian memorandum an thehlut nghal a, hetah hian ILP system hman thuai chu state chhunga NGO hrang hrang, a bikin zirlai pawlte pawhin an duh thu an tarlang tel a ni. Assembly-a opposition leader Mukul Sangma chuan Meghalaya Legislative Assembly-a ILP  system hman chungchang resolution lungrual taka pass tawh, sorkar laipuiin tun thlenga a la tikhawtlai zel chu pawi an tih thu a sawi. 

"State mipuite phut leh duhdan angin ILP  system hman duhna resolution hi pass a ni," tiin Congress palaite chuan an sawi. Sorkar laipuiin he dan hi hman a phalsak thuai theihna turin Governor chu hma la turin an ngen a ni. MRSSA chungchang pawh sawipuiin, kum 2016-a siam chu hman an duh tih a sawi. Hetih lai hian MRSSA amemdment bill hi Assembly-ah pass ni tawhin, hman a nih theihna atan Governor pawmpuina nghah mek a ni.