Tripura Congress hruaitu lawk a bâng

Tripura Congress Legislature Party (CLP) hruaitu Sudip Roy Barman chuan Ningani khan an party-a a nihna chelhmek a bansan thu a puang. A ban chhanah hian an party chu Left Front nen West Bengal assembly election-ah thawhho tumin hma an lak vang nia sawi a ni a, hei hi duh loin a bang ta a ni.

Sudip Roy Barman chuan, "Ka banna lehkha hi Congress president Sonia Gandhi leh Tripura assembly Speaker Ra-mendra Chandra Debnath hneah ka thehlut a ni" a ti. Barman hian thuthar lakhawmtute hmaah an state assembly budget session zawh ni, tunkar Ningani khan a ban thu hi a sawi.

Congress leader Samir Ranjan Barman chuan, Sudip Roy Barman bangta chu mak a ti tak zet a, a thawng tak zet tih a sawi. "A chhan ka hrethiam lo a, Left party nena thawhdun hi a duh lo tak zet nge Congress chhuahsana party dang zawm a tum tih chu thil hriatthiamhar tak a ni" a ti. Congress hruaitu chuan Left Front nena Bengal election-a thawhhona hian rah ṭha a chhuah zawk a rin thu a sawi thung.

Sudip Roy Barman hian February thla daih tawh khan Sonia Gandhi hnenah thawhho a duh loh thu hi a lo then tawh niin an sawi a, Congress chungkua-ah buaina a siam thei dawn niin an hria. Hetih lai hian Tripura Congress president Birajit Sinha leh party hruaitu
ṭhenkhat chuan Left party nena thawhona hi an kaltlangpui dawn tih an tichiang tawh.

Tripura-ah hian Congress hi opposition niin assembly member 60 zinga 10 an nei.