ASEAN-Northeast India Business Summit Imphal-ah ṭan

Association of South-east Asian Nations (ASEAN)-Northeast India Business Summit chu a vawikhat nan hmarchhak bialah neih a ni ta a, Ningani khan Imphal Manipurah-ah
ṭan a ni. Indian Chamber of Commerce bultuma summit hi buatsaih niin, ni thum chhung a awh ang. Summit ah hian palai 140 an tel a vawiin hian khar a ni ang. He summit hian inkalpawhna, insumdawn tawnna bakah tourism lam an sawiho.

Bangladesh Commerce Minister T. Ahmed chuan he summit hi Bangladesh tan a pawimawh hle tih sawiin, hmarchhak state-te nen an inhnaih avangin kawng tam takah ham-
ṭhatna a awm dawn a ni a ti. Bangladesh a sangha thar chhuahte Manipur-ah a thawn chhuak thei dawn a ni a ti bawk.

Manipur Commerce and Industries Minister Govindas Konthoujam chuan hmarchhak chu South, East leh Southeast Asia in awmna pawimawh tak a ni a, Bangladesh nen chuan insumdawn tawnna thuthlung an ziah vat a beisei tih sawiin, tunah hian hmarchhak state pathumte nen chuan inzawmna an neisa tih a sawi bawk.

Department of North Eastern Region (DONER) Secretary Navin Verma chuan Bhutan, Bangla-desh, Myanmar leh China ramria sum che vel chu a len thu sawiin, vaibelchhe 30,000 che vel anga ngaih a ni. Heng lai biala per capita income chu Mizoram leh Arunachal Pradesh state aia a san thu a tarlang bawk.

He summit-ah hian Minister of State for Development of North Eastern Region Jitendra Singh chu Khuallian atan sawm a ni a, nimahsela a telpui lo.