Vawiin-ah Assam election thawhhnihna

Vawiin hian Assam state election thawh hnihna leh a tawpna ni bawk chu neih a ni ang. Inthlan thawh khatna chu April 4 khan neih a lo ni tawh. Inthlan thawh hnihnaah hian Congress party leh BJP part te chu inbei nasa ber leh boruak nei lian ber an ni. Inrinni khan campaign theih hun a tawp a, assembly constituency 126 zinga 61-ah te inthlan thawh hnihna hi neih tur a ni.

Congress party chuan kum 15 zet ro an rel chhunga state hmasawnna hrang hrangte mipui hmaah an tlangaupui a, an hmachhawp hrang hrangte an tarlang bawk. Mipuite chu an vote hlu tak congress party tana hlan leh turin an ngen a, sorkarna siam leh an inbeisei hle.

Kumin inthlanah hian Indo-Bang-ladesh border chuan sawi a hlawh hle a, party lian pahnih Congress leh BJP te chuan inchirh theh nan tak hmangin nasa takin thiam lo zawkah an inpuh. BJP chuan state sorkar chu hmala tawk lo leh ngaih thah tiin a puh a, Bangladesh aṭanga Assam-a lut te chu vote duh vanga humah a puh bawk. Chutih lai chuan state-a sorkarna chang mek Congress hruaitu Tarun Gogoi chuan Modi-a kaihruai sorkar chuan ramri a ngaihthah thu leh ramri hungna mumal pawh awm lo ang hialin a sawi a, heng zawng zawng hi Modi sorkar thiam loh vang a ni a ti.

Eptu party lam chuan kum 2001 khan Assam-ah hian thalai hna neilo mi nuai li an awm thu leh kum ntga chhunga nuai 23-ah a kaisan thu an sawi ve mek bawk. Hei hian Congress sorkar chu a hlawhchham chiang hle a ni tih a tilang a ni an tibawk.

Bodoland Territorial Council (BTC) chu ngaihven ber pawl a ni a, he lai bialah hian Congress hi regional party, United Peoples’ Party (UPP) nen an thawkdun ang. He lai bialah vek hian BJP, Asom Gana Parishad (AGP) leh Bodoland Peoples’ Front (BPF) te chu an thawkho a ni.

Prime Minister Narendra Modi chu BJP-AGP-BPF alliance tan hian campaig-in Inrinni khan vantlang inkhawmah thu a sawi.

Congress party president Sonia Gandhi, vice-president Rahul Gandhi, State unit president Anjan Dutta bakah UPA minister hlui Ghulam Nabi Azad, Jairam Ramesh, Salman Khurshid, Sachin Pilot te chuan Assam-ah hian campain beihpui an thlak bawk.

Inthlan thawh hnihnaah hian Candi-date zingah Rakibul Hussain, Chandan Sarkar leh Nazrul Islam bakah chief minister ṭum hnih lai lo ni tawh AGP leader Prafulla Kumar Mahanta, Dhubri MP Badruddin Ajmal, Congress minister lo ni tawh Himanta Biswa Sarma te chu ngaihven hlawh zual an ni. Congress chuan seat 61 awmah hian seat 57-ah an chuh dawn a, AIUDF seat 47, BJP-in seat 35, Bodo Peoples’ Front (BPF) seat 10, Asom Gana Parishad (AGP) seat 19, CPM seat 9 leh CPI seat 5 an chuh dawn a ni.

Assam Election Watch leh Asso-ciation for Democratic Reforms (ADR) chuan kum 2011inthlana thlan tlin tak, kum 2015 election-ah ding nawn leh MLA 99 te thil neih hlut zawng chawhrual chu cheng vaibelchhe1.33 a ni a, tunah an affidavits aṭanga a lan dan chuan heng MLA te hausakna chawhrual hi vaibelchhe 2.58-ah a kaisan thu a tarlang. Kumin inthlanah hian Congress MLA ni lai 55 te chu an ding nawn leh a, BJP MLA 12 te bakah pary dang MLA te chuan inthanah hian an chuh ve leh a ni.

Heng zingah hian Congress MLA Sanjay Raj Subba chu a thil neih leh hausakna pung nasa ber a, kum 2011 khan a thil neih hlut zawng chu vaibelchhe 2 niin tuna a hausakna belhkhawm chu vaibelchhe 11 a tling tawh. A punna hi 446% lai a tling phak a ni. A dawtah hian Chandan Brahma chu awmin, a thil neih hlut zawng hi kum nga chhungin vaibelchhe 2.6 aṭangin vaibelchhe 9.5-ah a pung ve bawk.

He tih lai hian MLA ni lai mek 6 te hausakna chu a tlahniam ve thung a, chung zingah chuan AIUDF MLA Abul Kalam Azad hausakna chu 2%-in a tlahniam a, Congress MLA Hemanta Talukdar 12%, Klengdoon Engti 14%, Debrabrata Saikia 15%, Pradan Baruah 39% bakah Bidya Sing Engleng 72% te an ni.

Assam Pradesh Congress Committee (APCC) president Anjan Dutta chuan Badruddin Ajmal kaihruai All India United Democratic Front (AIUDF) leh Bharatiya Janata Party (BJP) te chuan Assam state election-ah a ruka inzawmna an nei niin a sawi.

Dutta chuan BJP leh AIUDF te hi kum 2014 Lok Sabha inthlanah khan an lo thawkho tawh niin a sawi a, Mongaldoi leh Guwahati-ah te candidate an nei a ni a ti. AIUDF hian Upper, Middle leh Lower Assam-ah te BJP puihnain candidate an thehchhuak a ni a ti.

Guwahati University-a department of Journalism and Mass Communication lecturer Chandan Goswami chuan Northeast Today palai zawhna chhangin, TV channel ṭhenkhat ten sorkarna siam tur a chiang tawh anga an tarlang chu a pawm ve loh thu sawiin, rinthu mai a la ni a, resul puan a nih hma chuan mipui rindan lakkhawm chu a pawm ve lo tih a sawi. May 19-ah sorkar thar chu a hriat chauh ang a ti.