Arunachal Pradesh-ah project tihkhawtlai a tam

Union Minister of State for Development of Northeastern Region (DoNER) Jitendra Singh chuan Zirtawpni khan Arunachal Pradesh-a project hrang hrang kalpui mek, tihkhawtlai ho chu chhunzawm leh thuai ni thei se a duh thu a sawi. Heng zinag hian Itanagar Airport siam mek pawh a tel. He thu hi Chief Minister Kalikho Pul nen an inhmuh ṭuma a sawi a ni.

Jitendra Singh hian Pul chu an state-a project kalpui tihkhaw tlai mek te chhunzawm leh thuai a nih theih nan hmalakpui a tiam a, thil hman hmawh thlak tak a nih thu a hrilh. Itanagar-a Airport siam mek chu a bik taka ngaihven a ṭul tih a sawi bawk. Project tih khawtlai zingah hian Film and Television Institute din tura hmalak mek chu a tel. He tih lai hian DoNER minister chuan Arunachal Pradesh-in leilung hausakna a ngah avangin hmabak a eng a, tourism lama ṭan la sauh sauh turin Pul hi a chah bawk.

Union Finance Minister Arun Jaitley chuan film institute dinna tur hi Union Budget-ah telh a nih thu a lo sawi tawh a, nimahsela hmalakna mumal taka kalpui a la ni lo. Itanagar-a assembly-cum-secretariat complex, February-March 2015 aṭanga sak tan tura tih chu kum khat chung tihkhawtlai a ni tawh bawk.

He tih lai hian Singh chuan Prime Minister Narendra Modi-an Arunachal Pradesh hma-sawnna kalpui chu a ngai pawimawh hle niin a sawi a, sorkar laipui chuan hmarchhak hmasawnna hi a ngai pawimawh a, chu chu hloh phal chi a ni lo a ti bawk.

Union Minister of State for Power and New & Renewal Energy Piyush Goyal chuan Arunachal-in power a thar chhuak hnem chu lawmawm a tih thu sawiin, sorkar laipui chuan a thlawp tlat niin a sawi ve bawk. Minister chuan sorkar laipui sum hmangin power project a kalpui tih a sawi a, he mi atan hian vaibelchhe 14.85 hman a ni. Goyal hi Chief Minister Kalikho Pul-an Delhi a tlawh ṭum khan power chung chang hi an sawi dun a, Ministry chuan Solar power supply chhungkaw 80,000 tan a ruahman mek a ni.

Arunachal Pradesh Chief Minister Kalikho Pul hian Delhi a cham chhung hian Rajnath, Rijuju, Smriti Irani, Jitendra Singh te a hmu bawk.