Manipur : CBI-in ralthuam ruk chhuah thubuaiah charge sheet theh lut

Central Bureau of Investigation (CBI) chuan nikum August 3-a Manipur-a 2nd Indian Reserve Battalion (IRB) aṭanga ralthuam ru chhuaktu ni ngeia rin, mi pasarih an chhuichianna charge sheet chu Court of Chief Judicial Magistrate, Guwahati-ah an theh lut. Court hian thubuai hi a ngaihtuah chhunzawm dawn a ni.

Ralthuam ruk thubuai hi nikum August 24, 2023 khan Moirang Police Station, Bishnupur District, Manipur-ah theh luh niin chhui zui hna hi CBI hian an chhunzawm ta a ni. Nikuma theh luh FIR-ah hian mi tu tih hriat lohte chuan silai 300, silai mu 19,800 leh ralthuam dang engemaw zat 2nd IRB, Narenseina, Bishnupur District, Battalion Headquarters aṭangin an ru chhuak nia ziah a ni.

CBI-in charge sheet an theh luh hi mi pasarih lakah niin, chungte chu; Laishram Prem Singh, Khumukcham Dhiren, Moirangthem Anand Singh, Athokpam Kajit, Loukrakpam Michael Mangangcha, Konthoujam Romojit Meitei, leh Keisham Johnson te an ni. Anni bakah hian mi dang rinhlelh leh inhnamhnawihna nei nia ngaihte chu chhui zui mek an la ni bawk.

Tribal hotute'n SoO tihtawp duh lohna an lantir

Manipur State Legislative assembly-in Kuki-Zo helpawlte nena an inremna Suspension of Operations (SoO) tihtawp a nihna tur resolution a pawm avangin Committee on Tribal Unity (CoTU) chuan hemi duh lohna lantir nan hian Kangpokpi district-ah nimin aṭang khan bandh an huaihawt.

Bandh hian nimin zing dar 10 aṭangin vawiin chawhma dar 10 thleng a awh dawn a ni. CoTU Information Secretary, Thangtinlen Haokip chuan assembly-in Kuki-Zo helpawlte nena an inremna ziah, SoO tihtawpna resolution an pawm mai chu remna leh muanna an duh lohzia lantirtu leh hnam anga buaina chawk chhuak thei a nih thu a sawi. CoTU chuan resolution duh lohna lantir nan hian nimin khan kawng an zawh bawk.