Assam : Chief Minister-in State Cancer Institute a hawng

Assam chief minister Himanta Biswa Sarma chuan Inrinni khan State Cancer Institute (SCI) leh Gauhati Medical College and Hospital (GMCH)-ah emergency department thar a hawng. Hengte hi Assam sorkar project Rs. vbc. 661.03 sen ralna tur 'Vikash Yatra' hnuaia thawh an ni.

Chief Minister chuan Assam-in cancer enkawlna ṭha neih a ngai pawimawh tih sawiin, chumi atan chuan Tata Trusts nen 2018 khan inremna an lo ziak tawh tih a sawi lang. Inremna an siam hnuaiah hian cancer care centre Dibrugarh, Barpeta, Silchar, Diphu leh Dhubri ah din a ni tawh tih sawiin, hemi bakah hian cancer enfiahna leh enkawlna clinic, state chhung hmun hrang hrang 11-ah an nei tawh tih a sawi bawk.

CM Sarma hian Dr B Borooah Cancer Institute (BBCI), Guwahati hawnna a nei leh bawk. Assam sorkar leh sorkar laipui thawk dun chuan BBCI hi cancer enkawlna hmun puitlinga siam a nih theih nan an thawk dun a ni. BBCI siam nan hian Rs. vbc. 13.14 sen a ni a, cancer natna nei mi 2,000 chuangin an hman ṭangkai theih tura ruahman a ni.

Assam CM hian cancer enkawlna tur hmun a hawn bakah hian project hrang hrang a tlangzarh bawk. Swachh Bharat Mission, Assam hnuaia Rs 9.000 dawn theihna tur a tlangzarh a, hemi hnuaia pawisa dawngtute hian inthiarna in siam nan an hmang dawn a ni. Hemi bakah hian in sakna hmuna thawktute'n riahna atan an hman tur Kar Bhawan, Rs. vbc. 122 senga sak tur chu a hawng bawk.