Meghalaya : BSF leh smuggler inkarah buaina a chhuak

Meghalaya-a East Khasi Hills district-a India leh Bangladesh ramriah Border Security Force (BSF) leh smuggler-te inkarah buaina a chhuak a, smuggler pakhatin nunna a chan.

Kar liam ta Zirtawpni zan khan Dalia khuaah buaina hi a chhuak a, BSF-te chuan phal loh thil tawlhruk tum ni ngeia hriatte chu khuaah hian an pung khawm tih an sawi. Smuggler-hoin BSF mi leh sate chu lung, rod leh hriamhrei hmanga an beih avangin buaina hi a chhuak nia hriat a ni. Beih an tawh avangin BSF lam hian silai an hmet puak zui ve bawk.

Buaina chhuakah hian BSF mi pathum chuan hliam an tuar a, Bangladesh lam mi smuggler chuan a nunna a chan bawk. BSF chuan India leh Bangladesh ramriah hian dan phal lohin ran, chini, purun, zu leh phal loh thil dangte chu an tawlhruk ṭhin langsar zual a nih thu an sawi.