Assam assembly election zawh a ni ta

Assam state assembly election thawh khatna chu April 4 khan zawh a ni tawh a, nimin khan a thawhnihna leh a tawpna chu zawhfel a ni ve leh ta. Inthlan thawh khatna-ah khan buiana liam tham thleng awm loin mipuite chuan boruak ralmuang tak hnuaiah vote an thlak a, polling station ṭhenkhatah buaina tenau awm mah se harsatna lian tham a thleng lo.

Kumin Assam state election hian India ram a chiah hneh hle a, central-a party hruaitu lawkte pawh campaignin an buai hle. Prime Minister Narendra Modi, BJP president Amith Shah, Congress hruaitu lawk Sonia Gandhi leh vice presiden Rahul Gandhi te chuan Assam-ah hian campaign-in ni eng emaw zat an chamchilh. Kawng hrang hrangin party tin te chuan mipui vote chan tumin theihtawp an chhuah. Congress-in kum 15 chhung zet sorkarna a lo chan tawh chu BJP lam chuan paih thlak tumin ṭan an la a, Congressa lamin sorkar leh ngei turin ṭan an khawh ve bawk.

Kumin inthlanah hian ramri chungchang chuan sawi a hlawh hle a, party hrang hrang te chuan inbeih nan tak an hmang nghe nghe a ni. Assam hi India rama state hmasawn chak ber pawl a nih avangin, party hrang hrang te chuan sorkarna siamtu nih an tum hle.

Assam state election thawh hnihna leh a tawpna bikah hian assembly constituency 61-ah inthlanna hi neih a ni a, inthlan thawh khatna chu constituency 65-ah neih a lo ni tawh a, constituency awm zawng zawng hi 126 a ni. Congress chuan seat 61 awmah hian seat 57-ah an chuh a, AIUDF-in seat 47, BJP-in seat 35, Bodo Peoples’ Front (BPF) seat 10, Asom Gana Parishad (AGP) seat 19, CPM seat 9 leh CPI-in seat 5 an chuh a ni.

Inthlan thawh hnihna a Legislative Assembly Consti-tuencies (LACs) 61 te hi Lower Assam, BTAD region leh central Assam te a ni. Heng constituency 61-ah te hian candidate 525 an awm a, an zinga 48 chu hmeichhia an ni. Candidate 182 te hi party nei an ni a, a bak zawng hi chu Independent leh a dangte an ni. Vote awm zawng zawng hi 1,04,53,277 an ni a, an zinga 53,91,204 te chu mipa niin hmeichhe vote nei 50,44,051an awm bawk. Polling station 505-ah vote thlak hi kalpui a ni a, observer 916 te chu heng hmunah te hian an insem darh a ni. Polling station 461-ah te hian video cameradah a ni a, Voter Verified Paper Audit Trail (VVPAT) chu constituency pasarih Dhubri, Bongaigaon, Goalpara East, Jalukbari, Dispur, Guwahati East leh Guwahati West-ah te hman a ni.