Tripura Congress buaina punlun zel

Tripura-a Congress party buaina chuan zia-awm lam a la pan thei meuh lo a, a punlun tulh tulh zawk rih dawn niin a lang.

West Bangal-a assembly inthlan neih turah Congress hian Left Party chu thawhpui turin inremna a lo siampui tawh a, party hruaitu lawk zingah duh lo tam tak an awm avangin an buai hle. Left party thawhpui duh lo zingah hian Tripura’s Congress Legislature Party (CLP) leader Sudip Roy Barman chu a hmahruaitu leh langsar tak dodalna lantirtu a ni.

Sudip Roy Barman hian Left Front party nena thawkdun tura inremna chu duh loin Tripura’s Congress Legislature Party-a a nihna chu a lo bansan tawh. Kar kalta Zirtawpni khan Barman bakah hian Congress hruaitu mi pali te chuan an party-a an nihna an chelh te an bansan ve leh. Tripura Congress working president Ashish Saha, state Youth Congress president Sushanta Chowdhury, West Tripura Lok Sabha constituency Youth Cong-ress president Viki Prasad leh East Tripura Lok Sabha constituency Youth Congress chief Rantu Deb te chuan an party-a nihna chelh mek chu an bansan tih an sawi a ni.

Communist Party of India-Marxist (CPI-M) kaihhruai Left Front te hian West Bengal inthlan lo awm turah inbiakna an neih hnuin thawk dun turin inremna an siam thei a, Congress mi leh sa te chuan nasa takin dodal mah se an inremna hi an kal tlangpui ta a ni.

State Assembly oppo-sition leader ni bawk Sudip Roy Barman chuan a duhlohna lan tirin Sonia Gandhi hnenah ziakin a lo thlen tawh a, kal tlangpui a nih tho avangin aan party-a a nihna a basan ta a ni. Congress MLA hel zing a mi Saha chuan Congress leh Left party thawhdun tum hian state chhung mai bakah, hmun zau zawkah nghawng tha lo a chhuah a hlauh thu a sawi. Inremna an siampui mai chu Congress mi eng emaw zat chuan mak an ti hle a, an baihvai tak zet a ni a ti bawk.

Tripura assembly Speaker Ramendra Chandra Debnath pawhin Sonia Gandhi hnenah February thla khan ngenna a lo thlen tawh a, Congress chhungkuaah boruak ṭha lo a hring chhuak thei a ni,a ti.

Hetih lai hian Tripura Congress president Birajit Sinha leh party hruaitu ṭhenkhat chuan Left Party nena inremna siam chungchangah hian Central-a party hruaitu te an la ngaichang niin an sawi thung. Barman leh Saha party te hian party thar an din dawn nge West Bengal Chief Minister Mamata Banerjee party Trinamool Congress an zawm dawn tih chu mipui ngaihven a ni mek.