Tripura-ah Puantahna din ve leh

Hamrchhak biala a pahnihna ni turin Zirtawpni khan Tripura-ah puantahna khawl bun chu hawn a ni leh ta. Chief Minister Manik Sarkar leh Union Textiles Minister Santosh Kumar Gangwar te chuan Western Tripura-a Bodhjungnagar industrial estate hawnna hun hi an hmanpui a ni.

Textile ministry chuan chuan hmarchhak state pariat te tan Apparel and Garment Making Centre (AGMC) siam nan hian veibelchhe 18 a ruahman a, AGMC hmasa ber chu tun hnai khan Nagaland-ah hawn a lo ni tawh a ni. AGMC hian mi 1,200 atanga 1,500 tan hna a siam thei dawn a, hnawthawk turte chu trainning tha tak pek an ni ang. Gangwar chuan, "Hmarchhak mi ten India ram hmun hrang hranga hna zawnga an chhuak thin chu tih tawp a tul thu a sawi a, mahni chenna hmun ngeiah hna pek chu sorkar laipui chuan a thil tum pakhat a ni" a ti. AGMC hi din belh zel tum a ni a, chu chuan hmarchhakah hian sum dawnna lian tak a siam thei a, thenawm ram Myanmar leh Bangladesh te nen pawh insum dawn tawnna kawng zau takin a hawng a ni a tibawk.

CM Sarkar chuan hawnna hunah hian thu a sawi ve bawk a, Tripura sorkar chuan small and medium industry te chu tih changtluna din belh zel a tum tih a sawi. He mi tur hian a ṭul angin loan te chu self-help groups (SHGs) te hnenah 4% pungin state Cooperative Bank atangin puk tir an ni a ti a, a pung hi 3.5%-ah tih hniam tum mek a nih thu a sawi bawk.

Hawnna hunah hian Tripura Industries and Finance Minister Tapan Chakraborty, assembly Deputy Speaker Pabitra Kar, Chief Secretary Y.P. Singh, union Textiles Secretary Rashmi Verma and Industries and Commerce Secretary M.Nagaraju te chu an tel a ni.