North East-a Readymade Apparel Unit pahnihna tur hawng

Hmarchhak biala thawm-hnaw siamna tur, readymade apparel manu-facturing unit pahnihna tur chu kar kalta Zirtawpni khan Tripura-ah hawn a ni.

Tripura Chief Minister Manik Sarkar leh union Textiles Minister Santosh Kumar Gangwar-te chuan Tripura khawthlang lam, Bodhjungnagar industrial estate-ah unit hi an hawng a ni

Textile ministry chuan ready-made garment manufacturing unit, ‘Apparel and Garment Making Centre’ (AGMC) tia sawi bawk hawnna tur hian hmarchhak state pariat hnenah cheng vaibelchhe 18 ṭheuh a pe a ni. Hei bakah hian hawn a nih hnuah pawh a enkawlna zuina turin sum hmangin a ṭanpui zui bawk ang. Hmarchhak biala AGMC hmasa ber tur chu kar kalta Nilaii khan Gangwar, Nagaland ah hawn a lo ni tawh bawk

Minister Gangwar chuan, "AGMC tin hian state tin tan hian mi 1,200-1,500 inkar hna thawh tur a siamsak thei dawn a ni' tiin, sorkar laipui chuan hmarchhak mite hnathawh tur zawnga state dang dang an pan a ngai ṭhin chu tihtawp sak a tum tih a sawi. "Readymade leh thawmhnaw dangte hi hmarchhak bial bakah a ṭhenawm Myanmar leh Bangladesh-ah te a market a lian hle a ni" a ti.

CM Sarkar pawhin Tripura sorkar chuan an state chhunga small and medium industry tilian tura theihtawp a chhuah thu a sawi a, "State sorkar hnuaia Cooperative Bank chuan self-help groups (SHGs) hnenah 4% chauha pungin loan a pe chhuak a, a punna rat hi 3.5% ah tihhniam thuai a la ni ang" a ti. State sorkar aṭanga ṭanpuina an dawn hnuah SHGs 8,000 vel chuan mahni kea dingin, thil ṭangkai tak tak an siamchhuak tawh niin CM chuan a sawi bawk.

AGMG hawnna in-khawm-ah hian Tri-pura Industries and Finance Minister Tapan Chakraborty, assembly Deputy Speaker Pabitra Kar, Chief Secretary Y.P. Singh, union Textiles Secretary Rashmi Verma leh Industries and Commerce Secretary M.Nagaraju te chu an tel ve bawk.