Assam inthlanah vote 82.02% a tla

Assam Assembly election thawhhnihna neih zawh takah vote a tla ṭha hle a, vote thlak ni tlai lam dar 5 thleng khan vote tla zat hi 82.02% a tling phak a ni. Chief Electoral Officer Vijayendran chuan vote tla zat hi a la danglam thei niin a sawi a, hmun ṭhenkhata vote tla report la dawn loh a awm avangin 85% a tlin chhoh theih an beisei thu a sawi.

Constituency 61-ah inthlan thawh hnihna hi neih a ni a, candidate 525 an awm. Candidate 525 zingah hian hmeiche candidate 48 an awm a ni.

Inthlan hi boruak muanawm tak hnuaia zawh fel niin report chuan a tarlang a, thawh khatna ang thoin polling station ṭhenkhatah EVM chiang lo report a awm leh a, harsatna lian tham erawh a thleng lo. Candidate an neih dan chu hetiang hi a ni - BJP 35, Congress 57, CPI 5, CPI (M) 9, AGP 19, AIUDF 47 leh BPF 10 te an ni a, dang zawng hi Independent leh a dangte an ni. Inthlan thawh khatna-ah khan vote 83.2% a tla a, inthlan thawh hnihnaah hian vote a tla ṭha zawk.

Assam-ah hian constituency 126 a awm a, inthlan thawh khatna-ah khan constiteuncy 65-ah inthlan hi kalpui a lo ni tawh. Inthlan thawh khatna-ah khan vote tla zawng zawng chu 95,11,732 a ni a, chung zinga 49,16,015 mipa an ni a, hmeichhe vote thlak 45,95,712 an awm bawk. Assam state election-ah hian an vaiin candidate 1,064 an awm a, hmeichhe candidate zawng zawng hi 91 an ni. Candidate zingah hian hruaitu hlun tak tak leh tuna MLA leh minister ni lai te awm nual bakah mihausa leh thiltithei tak tak an awm nuk bawk.

Polling station hrang hrangah Electronic Voting Machines (EVMs) 191 zet chu thlak a ni a, Gossaigaon constituency-a polling station - No. 24 Kachugaon M.E. School-ah chuan vote thlak ṭhat leh a ni.

Prime minister Manmohan Singh chuan Dispur Government High School, Guwahati-ah vote a thlak a, a nupui Gurcharan Kaur erawhin vote a thlak lo.

Central Reserve Police Force (CRPF) leh Special Protection Group (SPG) te chuan vote thlak turte uluk taka an endik hnuah polling centre-ah luh an phalsak chauh
ṭhin. Assam-ah hian kum 1996 inthlan khan vote 78.92% a tla a, a tlak that ber ṭum niin kuminah hian hei hi an khum dawn niin a lang. Salmara leh Goalpara-ah te chuan vote tla hi 90% a tling phak hial a ni. Hetih lai hian Guwahati East ah chuan vote tla hi 73% chauh a ni thung.

Inthlan thawh hnihnaah hian vote tla zawng zawng hi 1,04,35,277 a ni a, heng zinga 50,440,51 chu hmeichhia an ni. Vote hi polling station 12,699 ah thlak a ni.

Inthlan thawh hniha neihah hian party lian pahnih BJP leh Congress party te chuan candidate an ngah fal hle a, Congress-in candidate 122 neiin BJP chuan candidate 87 a theh chhuak ve bawk. Inthlan neih zawh takah hian vote thlak nan Verified Paper Audit Trail (VVPAT) leh Electronic Voting Machine hman a ni. Venhimna khauh taka kalpui a ni a, buaina lian tham chhuak a awm lo. Hel pawl te thawm a reh a, mipui ten thlamuang takin vote an thlak thei a ni. Inthlan result hi May thlaah puan a ni ang.