Meghalaya politics-ah buaina thleng

Meghalaya-a North Garo Hills-a Congress hruaitu ṭhenkhat chuan party-a an nihna te an bansan thu Inrinni khan an sawi ve leh. Party-a nihna bansan zingah hian Minister hlui Frankenstein W Momin leh midang pariat te an tel a, Meghalaya Chief Minister Mukul Sangma lakah lungawi loin an nihna an bansan.

Momin hi Mendipathar bial aṭangin kum 2013 khan MLA atan thlan tlin a ni a, North Garo Hills-a District Congress Committee-ah adviser a ni bawk. North Garo Hills districs-a Congress mi leh sa lungawilote hian District Congress Committee President hnenah an banna hi an thehlut a ni.

Momin chuan an state Chief Minister-in an party a kaihhruai danah an lawm lo tih a sawi a, Congress chu Mukul-a Congress a ni, Meghalaya Congress a ni lo, a ti. Ngun taka a ngaihtuah hnuah thutlukna chu a siam tih a sawi bawk. District Congress Committee General Secretary leh Sengnab Momin te chuan thuchhuah siamin an party kaldanah hian hruaitu theng khat chu an lo lawm lo hle tih a sawi a, hei hian nghawng ṭhalo a hring chhuak mek a ni, a ti bawk. General secretary chuan party chhungah langtlanga thil tih a awm lo niin a sawi.

Party-a lungawi lo, nihna bansan ta zingah hian District Congress Committee General Secretary Smith K Marak, District Mahila Congress President Chremline K Sangma, District Mahila Congress Vice President Lakitha D Shira, Minubel K Marak, Sachin Arengh, Organising Secretary Mendipathar Block Congress Committee Sengprang Sangma, Vice President, Mendipathar Youth Congress leh Men-dipathar Block Congress Committee Executive Member Pobonjon Sangma te an tel.