Assam-ah buaina chhuak

Assam-a Tinsukia district, Pengaree-ah Thawhtanni khan police leh hnathawktute inkarah buaina a chhuak a, mi 11 an thih bakah hliam 18 an awm.

Report-in a tarlan dan chuan thingpui huana hnathawk 10,000 vel te chuan Pengeree police station an pan a, tunhnaia tualthahna thleng chungchangah hnathawktute tih nia an puh chu hriatthiam har an tih thu an thlen a ni. Heng mite hi police te nen innawrin boaruak a sosang nghal hle a, bungrua eng emaw zat an tichhia. Police te hian silai an hmetpuak a, mi 10 te chu a hmunah hian an thi nghal a, thi zinga paruk te chu hmeichhia an ni. Hliam tuar tam tak an awm a, heng mite hi Tinsukia Civil Hospital leh Assam Medical College Hospital, Dibrugarh-ah te dahluh nghal an ni.

Tinsukia district DC, Senior police, Civil administrative official leh SP te chuan buaina thlenna hmun hi an pan nghal a, he lai huam chhungah hian curfew puan nghal a ni.

Chief Minister Tarun Gogoi chuan judicial inquiry din nghal turin thu a pe a, boruak sang tireh turin hmalak nghal a ni. Gogoi hian Tinsukia district Deputy Commissioner chu dan leh thupek khauh taka kengkawh nghal turin a hriattir a ni. Hetih lai hian Assam BJP president Sarbananda Sonowal chuan thil thleng chu pawi a tih thu leh, chhui chian a phut thu a sawi. Sonowal hian thi chhungte hnenah hian zangna dawmna nuai 1 leh hliam tuarte tan cheng 25,000 pe turin sorkar a ngen nghal bawk.