Manipur-ah Industrial Estate lungphum phum a ni

Union Minister of Micro, Small and Medium Enterprises (MSME) Kalraj Mishra chuan Inrinni khan Manipur-a Industrial Estate dinna tur lungphum a phum.

Union Minister hian Mani-pur Industrial Expo Lamboi-khongnangkhong, Imphal West-ah neih chu a chhim nghal bawk. Mishra chuan thu sawiin Ministry of MSME chuan India ramah scheme hrang hrang a kalpui mek thu leh, hei hi ṭhalai leh interpreneur te tan chhenfakawm tak tur a nih thu a sawi. Chung zingah chuan Scheme for Promotion of Innovation, Rural Industry & Entrepreneurship (ASPIRE), Prime Minister Employment Generation Programme (PMEGP) leh Scheme of Fund for Regeneration of Traditional Industry Scheme (SFURTI) te chu kalpui mek a nih thu a sawi bawk.

Minister chuan, Prime Minister Narendra Modi thusawi sawi chhawngin India ram chu hmarchhakin hma a sawn phawt loh chuan hmasawnna chu a khairual theilo a ni, a ti.

Tunah hian hmarchhak tan cottage industry din tuma hmalak mek a ni thu a sawi bawk. Chief Minister Okram Ibobi Singh chuan Industrial Estate lungphum phumna hun hi a hmanpui a, MSME Giriraj Singh, Commerce & Industries minister Govindas Konthoujam, Development commissioner MSME Surendranath Tripathi, Additional Secretary, Government of India bakah DG of International Chamber for Service Centre Dr Gulshan Sharma te an tel ve bawk.