Manipur : AFSPA hnuaia Imphal Valley dah leh phut

Manipur Kuki-Zo tribal-te chuan Thawhṭanni khan Sadar Hills Kangpokpi District-ah kawng zawhin, Imphal phairuamah Armed Forces Special Power Act (AFSPA) chu hman leh ngei an phut. Kawng zawh hi Committee on Tribal Unity (CoTU) huaihawt niin Manipur assembly-in Suspension of Operation (SoO) sutna tur resolution an pawm avanga huaihawt a ni.

CoTU hian SoO sut a ni chu pawm thiam har an tih thu sawiin, Manipur Assembly thutlukna chu hnam inkara buaina chawk chhuak thei leh SoO inremnaa tel ve dangte rawn miah loa sut a ni chu pawi an ti hle tih an sawi. Hemi avanga kawng zawh hi huaihawt niin, kawng zawhtute chuan tlang lama cheng Kuki-Zo hnam tan SoO chu a pawimawh tluk zetin Imphal phairuam AFSPA hnuaia dah leh a ṭul thu an sawi. Imphal phairuama police station 19 huam chhung chu AFSPA hnuaia dah leh an phut a ni.

Kawngzawh hi Nute Kailhang aṭangin ṭan a ni a, National Highway-2 zawh chhoin Kangpokpi bridge, SP office bul thlengin an zawh a ni. Police-te chu buaina chhuah palh venthawn thilah inralrintir an ni a, mahse, mipui pun khawmnaah hian buaina chhuak a awm lo a, boruak ralmuang tak hnuaiah kawng hi an zawh a ni. CoTU hian SoO sutna resolution pawm duh lohna lantir nan hian kawng zawh bakah hian March 4 zing dar 10 aṭang khan darkar 24 awh bandh an lo huaihawt tawh bawk.

CoTU thupuangtu, Kaiminlen Sitlhou chuan thuthar thehdartute a kawmnaah bandh leh kawng zawh huaihawt a nih chhan sawiin, rorel lai sorkar chuan mipui huap ni lo resolution a pawm avang hian assembly zahawmna chu a tibawrhbang tih a sawi. Hun rei tak tualchhung buaina a thlen tawh hnuah, sorkar chu dan leh thupek kenkawh kawnga ṭan la zawk tur a nih laia, SoO lam lo buaipui chu a hun lo hle a ni, a ti.

Manipur assembly-in a sût tak, Kuki-Zo helpawl nena an inremna SoO chu remna leh muanna duh avanga siam a ni tiin Kaiminlen chuan a sawi a, SoO thlawp lo apiang chu remna duh loah a puh bawk. Kuki-Zo helpawl ni loin Imphal-a kalfawr pawl awm mek, sokar enkawltute chu ngaihven an ngai zawk tih a sawi bawk. Kaiminlen chuan sorkar laipui chuan buaina tihziaawm a duh tak tak a nih chuan Imphal phairuama AFSPA puan leh chu hreh lo tura a duh thu a sawi a, AFSPA thuneihna hnuaia Imphal a awm leh chuan an state buaina chu chinfel a awlsam sawt dawn niin a sawi.