Sikkim : Assembly Speaker hlui beihnaa inhnamhnawihah CM puh

Sikkim assembly speaker hlui KN Rai chuan kar liam ta Zirtawpni khan beih a tawk a, he thil thlengah hian Sikkim chief minister ni lai, Prem Singh Golay chuan inhnamhnawihna a nei ngei nia an hriat thu Sikkim Democratic Front (SDF) hruaitu Pawan Kumar Chamling chuan a sawi.

SDF hotu, PK Chamling hian speaker hlui bei ngam khawpa huaisâr leh chhia leh ṭha hre lo chu Sikkim Krantikari Morcha (SKM) hruaitute chauh hi an ni a, anmahni kaihhruaina hnuaiah KN Rai hian beih a tawk tih kan hria a ni, tiin a sawi. Chamling chuan Thawhlehni ral hma ngeia pawikhawihtute hi man an nih loh chuan SKM laka lungawi lohna lantir an tum thu a sawi zui bawk.

Speaker hlui, KN Rai hi SDF party niin Zirtawpni khan an party tan Majhi Gaon-a a campaign lai chu misualin hmanraw nen an bei a ni. Rai hi a hliam enkawl turin New Delhi lamah phurh thlak nghal a ni. He thil kaihhnawihah hian mi pali man ni tawhin, thu zawh fiah turin police-in an kawl mek.