Nagaland : Helpawl leh Assam Rifle inkahnaah mi pakhatin thi

Assam Rifle leh helpawl, NSCN (K) mi leh sa ni ngeia ngaihte chu Thawhṭanni zan khan an inkap a, helpawl lam mi pakhatin nunna a chan. Inkahna hi Sangsa khua, Mon district, Nagaland-a thleng a ni.

Helpawl lam hian an tihdan pangngaia thingtlang khuaa pawisa an khawn lai chu Assam Rifle hian an va nangching a ni. Sipai lam hian khua an luh hmain helpawl, khuaa lo awmsate chuan lo hmuin an lo kap a, Assam Rifle pawhin kap let ve nghalin, helpawl mi pakhat an kap hlum a, midang pakhat an man bawk a ni. Intelligence lam aṭanga thu dawn danin helpawlte hi NSCN (K) mi leh sa nia hriat an ni.

Assam Rifle hian inkahna thlen zawh hnu hian helpawlte tlanchhiatsan an ralthuamte chu an man bawk, heng zingah hian automatic rifle pakhat, pistol pakhat, grenade, silai mu leh inbeihnaa hman tur ralthuam hrang hrangte an ni. Ministry of Defence chuan Assam Rifle lam hi an chet ṭhat avangin anmahni fakna thu an tichhuak hial a ni.