Manipur sorkarin zángnadawmna a pe chhuak tawh : Manipur CM

Manipur legislative assembly neih mekah chief minister N Biren Singh chuan zawhna chhangin, an state chhung buaina avanga nunna chan mi 114 chhungte hnenah zángnadawmna pek an nih tawh thu a sawi. Hemi bakah hian state chhung buaina chungchangah zawhna hrang hrang a chhang tel bawk.

Chief Minister hian nikum May 3 hnu lamah tualchhung buaina chhuak vangin mi 213-in nunna an chan tawh tih a sawi a, heng zinga 198 hi civil mi niin an zingah hian naupang pariat leh hmeichhia 20 an awm thu a sawi lang bawk. Biren Singh chuan zángnadawmna chu mi 114-te tan pe chhuak tawhin, a bak la pek lohte chuan an dawng thei dawn em tih an zir chian mek thu a sawi bawk. CM hian house-ah hian an hriat theih chinah February thla thleng Myanmar aṭanga dan loa lut mi 20,000 chuang an awm thu leh, an zinga 259 chu thawn let an nih thu a sawi bawk a ni.

Biren Singh hian an state chhungah relief camp 320 a awm mek tih tarlangin, a kaihhruai sorkar chuan an ni tin mamawh phuhruk turin ṭan a la mek a ni, a ti. Tun dinhmunah in leh lo chan avanga vantlang hall-a khawsa eng emaw zat an la awm a, chungho tan chuan chenna tur ṭha zawk an ruahmansak mek thu leh, May thla ral hma ngeia sawn chhuah hman an tum thu a sawi bawk.

Manipur legislative assembly session neih mekah hian Thawhṭanni khan Manipur Name of Places Bill, 2024 an pawm a, he dan thar hnuaiah hian hmun leh khaw hming thlak chu hrem theih a ni ang. He dan thar hi Meitei leh Kuki-Zo hnam buaina avanga lo piang a ni a, hnam pakhatin an chenna hmun ṭhenkhat hming an lo tihdanglam venna atana siam a ni. Dan thar hnuaiah hian dan bawhchhiate chu kum thum lung-in tan emaw cheng nuai 2 thleng chawitir theih an ni ang.

Kangpokpi district-ah ralthuam ṭhahnem tak man

Indian Army leh Manipur police chuan joint operation neiin, Kangpokpi district-a Sadar Joute leh T Mongbung khuaah ralthuam thuhruk ṭhahnem tak an man.

PRO Defence, Manipur chuan heng khaw pahnihah hian ralthuam ṭhahnem tak thuhruk a nih tih thu rintlak tak an dawng a, hemi bawhzuia dap an nih thu a sawi. Ralthuam an mante hi 9mm carbine, mortar, 9mm pistol, granade, silaimu, leh indonaa hman chi hmanraw hrang hrangte a ni a, hengte hi police kutah hlan niin, anni hian a ṭul angin hma an la zui dawn a ni.