Tripura : Sorkar hnathawk leh pensioner-te DA/DR 5%-in tipung dawn

Tripura chief minister Dr Manik Saha chuan state sorkar hnuaia hnathawkte leh pension tawhte Dearness Allowance (DA) leh Dearness Relief (DR) chu 5% a tihpun a nih tur thu a puang.

Chief Minister Saha hian budget session an neih mek ni hnuhnung berah he thu hi puangin, sorkarna an chelh hnuah hetianga hamṭhatna tihsan a nih vawi thumna a ni.

Manik Saha chuan DA/DR tihpun chuan state sorkarin a hnuaia thawkte hamṭhatna a ngaihsakzia lantirna a nih thu sawiin, sum lamah harsatna tawk mah se, sorkar hnathawkte hamṭhatna tur a nih dawn avangin DA/DR hi tipung an nih thu a sawi. Saha chuan 5%-a DA/DR tihsan avang hian state sorkar sumbawm aṭangin Rs. vbc. 500 chuang sen belh a ngai dawn tih a sawi lang bawk. DA/DR tihpun hian sorkar hnathawk mi nuai 1.06 bakah pensioner 82,000 chuang tan hamṭhatna a thlen dawn a ni.