Yatra buaina kaihhnawihah Assam police-in Rahul Gandhi ko dawn

Assam chief minister Himanata Biswa Sarma chuan Assam-a Bharat Jodo Nyay Yatra neih ṭuma buaina chhuak kaihhnawihah, Assam police-te chuan Congress party hruaitu Rahul Gandhi chu an hmaa inlan turin an ko dawn tih a sawi.

Yatra neih laia Guwahati-a buaina a chhuah vang khan police-ah thubuai theh luh a ni a, police-te chuan an chhui chiang mek tih an sawi a ni.

Himanta Biswa Sarma chuan Rahul Gandhi koh hun tur chu Lok Sabha inthlan zawh lamah a nih tur thu a sawi a, Congress hotupa hi amah ngei a inlan a ngai dawn bawk a ni, a ti. Police-te hian Assam Congress hruaitu pahnih Bhupen Kumar Borah leh Debabrata Saikia chu police hmaa inlan turin an hriattir tawh bawk a, mahse, an pahnih hian an la inlan lo thung.

Assam sorkar hian Rahul Gandhi leh a hnungzuitute lakah thubuai an theh lut a, Yatra neih laia tharum thawhah puh niin IPC section hrang hrang hnuaiah thubuai hi ziah luh a ni. Bharat Jodo Nyay Yatra hi Rahul Gandhi kaihhruaina hnuaiah neih a ni a, January 14 khan Manipur aṭanga bul ṭan niin March 20 khian Mumbai-ah zawhfel tura ruahman a ni. Assam-ah hian January 18 aṭanga 25 inkar khan neih niin, district 17-ah Yatra hi neih a ni.