Hmarchhak state zingah AP-in JJM tihlawhtling hmasa ber

Arunachal Pradesh-ah Jal Jeevan Mission (JJM) hnuaia hna 100% zawh a ni tawh a, hmarchhak huamchhunga JJM thil tum tihlawhtling hmasa ber state an ni a, rampum huapin hetiang ti thei state 10-na an ni bawk.

Arunachal Pradesh chief minister Pema Khandu chuan an state-in hetiang hlawhtlinna an chan theih avang hian a lawm thu sawiin, JJM hlawhtlinna atana thawktu Public Health Engineering Department (PHED) chungah lawmthu a sawi bawk. Khandu chuan an state chu ram chhengchhe tak leh khaw darhsarh tak taka awm an a ni a, heti chunga JJM hlawhtling taka kalpui a ni thei chu ropui a ti tak zet tih a sawi.

Pema Khandu chuan JJM ṭan a nih laiin an state-ah mahni in chhunga tui herh haw theihna nei chu chhungkaw 20,989 chiah an awm tih sawiin, tunah chuan chhungkaw nuai 2.9-ah a kai chho tawh a ni, a ti. Khandu chuan JJM chu Arunachal Jal Sakti Yojana (AJSY) nen ṭangkawpin hmalakna chak tak an neih theih phah niin a tarlang.

Jal Jeevan Mission hi sorkar laipui scheme niin kum 2019 khan bul ṭan a ni. He mission-in a tum ber chu kum 2024 ral hmaa India ramchhung thingtlang khuaa in zawng zawngte chu mahni in ngeia tui herh hawtir theih (Functional Household Tap Connections) a ni a, mi pakhat tan ni khatah tui litre 55 zel pek chhuah chu JJM hnuaiah hian tum a ni.