Manipur-in sorkar laipui hnenah NRC hman dil dawn

Manipur chief minister N. Biren Singh chuan an state chhunga National Register for Citizens (NRC) hmang turin sorkar laipuiah rawtna a thlen dawn tih Nilaini khan a sawi.

NRC hman chu state sorkar tan mahnia tih theih a nih loh avangin, sorkar laipuiah rawtna hi a thlen phawt dawn tih Chief Minister hian a sawi a ni.

Manipur legislative assembly pawhin tun hnai lawk khan sorkar laipuiin an state-a NRC a hman theih nan resolution a lo pawm tawh bawk. Biren Singh chuan,"NRC hman hi state sorkar tan tih mai theih a nih loh avangin sorkar laipui puihna kan dil a ni. House pawhin hetiang tur hian resolution a pawmpui tawh a, NRC hman ṭan a nih thuai theih nan sorkar laipui hnenah tih tur ṭul leh rawtna kan thlen leh dawn a ni" a ti.

Manipur-ah hian Inner Line Permit (ILP) hman ṭan a nih dawn khan, dan phal china an state chhunga lut bithliah nan kum 1961 hmangin, hemi kum leh a hma lama lutte chauh chu pawm an ni dawn tiin kum 2022 khan Manipur cabinet chuan thutlukna a lo siam tawh a ni. NRC kalpui a nih hunah pawh kum 1961 hnua an state chhunga lutte chu pawm an ni dawn lo niin Manipur chief minister chuan a sawi.

Inbiakna hmanga remna zawn a ngai : Kiren Rijiju

Union minister of earth science, Kiren Rijiju chuan Manipur buaina chu inbiakna hmang chauha chinfel chi a nih thu a sawi a, prime minister Narenda Modi kaihhruai sorkar chuan Manipur state chu nunphung pangngaia lettir leh tumin ṭan a la tih a sawi bawk.

Rijiju hian nimin khan thuthar thehdarhtute kawmin, Manipur buaina chhuah chhan berah Manipur High Court chu puhin, Meitei tana Scheduled Tribe (ST) nihna pe ve tura rawtna thu a chhuah avanga buaina chu inṭan a nih thu a sawi. Rijiju chuan buaina chinfel an duh tak tak a nih chuan Meitei leh Kuki hnamte chu ralthuam dah ngam turin a ngen bawk.

Union minister chuan Manipur buaina a reh theih nan sorkar laipui chuan theihtawpin ṭan a la a, Prime Minister Narendra Modi pawhin parliament leh Red Fort aṭanga thu a sawinaah remna a awm theih nan ngenna a siam thu a tarlang.

Manipur tualchhung buaina thleng chu hmarchhak buaina a nih avanga ngaihsak hlawh lo anga sawi ṭhin chungchangah, Rijiju chuan union home minister Amit Shah-a'n ni li chamin a tlawh tawh thu leh minister of state for home, Nityanad Rai pawhin ni 22 lai chama Manipur a tlawh thu a sawi a, hemi bakah hian sorkar hnathawk pawimawh tak takte'n an vil reng thu a sawi lang bawk.