Khualzinte him nan Assam-in 'Tourist Police' an nei dawn

Assam tourism department chuan khualzinte'n an state chhunga him taka hun an hman theih nan "Tourist Police' an nei dawn.

Assam-ah hian Covid-19 hripui a ziaawm hnuah khualzin an pung hle a, hei vang hian an state tlawhtu khualzinte himna tur hian ruahmanna an siam a ni.

Khualzin pung zel avangin Assam Tourism (Development and Registration) Bill 2024-ah chuan tourist police siamna tur hi telh a ni a, khualzinte thlen ṭhinna khualbuk neitu zawng zawngte chu department hnuaia inziak lut vek tura tih an ni bawk. Heng bakah hian tourist police station siam leh khualzinte him nana tihtur pawimawh leh ṭulte ruahman a ni bawk a ni.

Union tourism ministry chuan kum 2022 khan khualzinte him nan tourist police nei turin state leh UT zawng zawng hnenah rawtna a lo siam tawh a, tunah hian Goa leh Kerala chuan an nei tawh a ni. Tourist police-te hian khualzinte'n an tlawh ṭhin hmunhmate chu an enfiah ṭhin a, hei hi khualzin himna atan a ṭangkai hle.

Assam tlawhtu khualzin hi kum 2022 khan mi nuai 17.03 niin, nikumah erawh nuai 98.31-ah an pung chho a ni.