Tripura eptu party lian berin BJP kaihhruai sorkar zawm

Tripura-a eptu party lian ber, TIPRA Motha chuan nimin khan BJP kaihhruai sorkar an zawm. TIPRA hruaitu pahnih, Leader of the Opposition Animesh Debbarma leh MLA Brishaketu Debbarma-te chu minister atan lak luh nghal an ni.

TIPRA Motha-in sorkar a zawm ve leh tak avangin, Tripura-a ṭangrual sorkarah hian BJP, IPFT leh TIPRA-te an tel ta a ni.

Chief minister Dr Manik Saha chuan minister thar pahnihte chu a lawmpui thu a sawi a, Tripura hmasawn nan thawhhona ṭha tak an neih theih a beisei thu a sawi. Animesh Debbarma chuan,"Leader of Opposition ka nih lai khan mawhphurhna lian tak ka nei a, tunah minister ka nih hnu hian mipuite lakah mawhphurhna lian lehzual ka nei niin ka inhria. Mipuite tan ṭha taka hnathawh ka tum a ni" a ti.

TIPRA Motha dintu Pradyot Kishore Debbarman chuan an party aṭanga minister pahnihte chuan Tiprasa mipuite tan hma an lak zel dawn thu a sawi a, sorkar lai chu zawm mah se, an mi leh sate thil phut chu sawi chhuah ngam loh phah nan an hmang dawn lo tih a sawi. Pradyot chuan 'Greater Tipraland' an phut chungchang pawh sawi langin, an thil phut chu la ngai reng a, tunah rih chuan Tiprasa mipuite hmasawnna chu ngaih pawimawh hmasak phawt a ngai tih a sawi.