Nagaland-ah rualbanlote tan 'Hamari Vaani' tlangzarh

Nagaland non-governmental organisation, Prodigals Home leh EnAble India thawk dun chuan rualbanlote hman ṭangkai tur social networking platform 'Hamari Vaani' an tlangzarh.

Rualbanlote hian Hamari Vaani kaltlang hian ṭhian an kawm thei dawn a, Interactive Voice Response (IVR) platform hmanga duan a nih avangin internet a ngai lo a ni. Hamari Vaani hmangtute hian IVR channel hrang hrang an enkual thei dawn a, he channel-ah hian hnathawh tur an zawn theih bakah sorkar aṭanga anmahni tana hamṭhatna awm en nan leh, an harsatna ang tuar ve thote'n hlawhtlinna an chan dante a en theih dawn a ni.

EnAble India regional director, Shijo Joseph chuan an hmalakna chuan thingtlang kilkhawr zawka cheng rualbanlote tan hamṭhatna a thlen ngei a beisei thu leh, an hmasawnna atan ṭangkai taka an hman a beisei tih a sawi. Diethono Nakhro, State Commissioner for Persons with Disabilities, Nagaland pawhin an state chhunga rualbanlote tan Hamari Vaani chu a pawimawh thu sawiin English emaw Naga ṭawng emawa hman theih tura chhawp chhuah a ngaih thu a sawi bawk.