AASU-in CAA dodalna an lantir

All Assam Students' Union (AASU) chuan an state chhunga Citizenship Amendment Act (CAA) hman tumna dodalna lantirin, Ningani khan district hrang hrangah motorcycle rally an nei. CAA hi Assam huam chhunga hman ve loh an ngiat a ni.

AASU vice president Nabajyoti Roy chuan lirthei hmanga kawng zawh hi kaihruaiin, AASU hruaitu dangte leh midang ṭhahnem takin an zui a ni. Guwahati, Dibrugarh, Kokrajhar leh district hrang hrangah rally hi neih a ni a, buaina chhuak palh hlauhthawn avangin thuneitu lam chuan venhimna khauh takin an kalpui bawk.

Assam zirlai pawl hian tun thla tir khan CAA dodalna lantir nan thuchhuah siamin, Ningania motor cycle rally bakah prime minister Narendra Modi-a'n Assam-a tlawh ni tura a ruahman, nimin (March 8) khan CAA dodal avanga nunna chan mi panga hriatrengna hun an hman tur thu an lo sawi tawh a ni. Tukin zing dar 6 aṭanga tlai dar 6 thleng chaw ngheiin nawrh an huaihawt dawn bawk.

AASU chuan district khawpui zawng zawngah CAA duh lohna lantir nan Satyagraha neih a nih tur thu an sawi bawk a, a hun leh ni tur erawh an la tichiang lo thung a ni.

Samujjal Kumar Bhattacharya, AASU chief advisor chuan sorkar laipuiin Assam a enkawl danah an lungawi loh thu a sawi a, an ngawi bo mai mai dawn lo tih sawiin, an lungawi lohna chu an lantir chhunzawm zel dawn tih a tarlang. Bhattacharya chuan sorkar laipui leh state sorkar chu Assam ram leilung fate hma hun tichhe zawnga chet la lo turin a vau khan a ni. CAA chu an duh loh thu leh Assam huam chhunga hman a nih dawn chuan an dodal tlat tur thu a sawi a, CAA chu Assam Accord nena a inkalh thu leh Bangladesh aṭanga dan loa Assam lutte humhimna a nih thu a sawi. AASU chief advisor hian an duh lohna lantirna chuan zirlaite zirnaah nghawng a nei dawn lo tih a sawi bawk.

AASU hian pawl dangte nena thawkhoa CAA dodal zel an tum tih tarlangin, president, Utpal Sarma leh general secretary Sankarjyoti Baruah-te chuan Assam mite tana dan ṭha lo tak hi an pawm theih loh thu te, ram dang mi, Assam-a lut chu leilung fate tan phurrit an nih an phal dawn loh thute an sawi a ni.