Manipur : Imphal leh Ukhrul inkar kawngpui dang

Manipur state chhunga Imphal leh Ukhrul inkar kawngpuiah Nilaini aṭang khan tiam chin awm loin bandh huaihawt a ni. Bandh hi Imphal-Ukhrul kawngpui zawh ṭhinte hnena dan loa pawisa khawn ṭhin duh lohna lantirna atan huaihawt a ni a, engtik thleng nge a awh dawn hriat a ni lo.

Bandh hi Joint Action Committee (JAC) anga inzawm khawm, pawl hrang hrang - Ukhrul District Taxi Welfare Association (UDTWA), All Tangkhul Drivers Association, Bus Association, DI Association leh Truck Association-in an huaihawt a ni. JAC convener, Khathing chuan state sorkarin Imphal-Ukhrul inkara pawisa khawn ṭhinte laka hmalakna mumal a neih loh avanga bandh chu huaihawt an nih thu a sawi a, heng khaw pahnih inkar kawngpuiah hian Imphal phairuama inkhuar Civil Society Organisations (CSOs) chuan thilpek (donation) changchawiin pawisa an khawn ṭhin thu a sawi.

JAC hian pawisa hi dan phal loha khawn ṭhin a nih thu leh mipui phur lirthei; bus, taxi leh bungraw phurte laka khawn ber ṭhin a nih thu an tarlang. Bandh avang hian helai kawngpui zawh mipuite chuan harsatna an tawh phah a, khualzin tam tak chu kawngah hian an tangkhang a ni. JAC hian Mahadev, Litan leh Finch Corner-ahte bandh kengkawh tur duty an indah a ni.