Manipur sorkarin 'No Work, No Pay" kalpui dawn

Manipur sorkar chuan a hnuaia hnathawkte chu chhan ṭha tak awm loa an chawl emaw thuneitute hriatpuina tel loa chawlh an la a nih chuan hlawh a pe tawh dawn lo. Sorkar-in 'No Work, No Pay" a kalpui chhan hi sorkar hnathawkteah inkaihhruaina mumal zawk a awm nana ti an nih thu an sawi.

Manipur chief secretary Vineet Joshi chuan thuchhuah siamin, state chhunga sorkar hnathawk tam tak chuan hna an thawk lo tih an hriat thu a sawi a, chhan mumal awm loin chawlh an la niin a sawi. Sorkar hnathawk tualchhung buaina avanga mahni awmna tur hmuna hna thawk ngam lote chu attached-in hmun dangah sawn an nih thu a sawi bawk.

Vineet Joshi chuan phalna nei loa an hna aṭanga chawlte chu CCS (Conduct) Rules, 1964-in a sawi angin, mahni hna ngai pawimawh lo leh thawk ṭha lo an nih avangin state sorkar chuan a ngai thutak hle a ni, a ti. Chief Secretary chuan Secretary, DC leh Department hotute zawng zawng chu an hnuaia thawkte chhan mumal awm loa chawl emaw hotute hriattir hmasa loa chawlh la an awm a nih chuan an chungah hma la turin a hriattir.

Joshi chuan sorkar hnathawk, chhan mumal awm loa chawlte lakah dan angin hma an lak tur thu hi a sawi a, Fundamental Rule 17(1)-in a phal angin hlawh pek an nih loh bakah an hnain a ken tel hamṭhatna dang dawng thei lo tura hrem turin sorkar hotute chu a hriattir nghal bawk a ni.

Chief Secretary thuchhuahah hian administrative secretary, DC leh Department hotute zawng zawngte chu an state chhung buaina avanga hmun danga attached-a dahte list felfai taka siam tura hriattir an ni. Hemi bakah hian DC leh Department hotute chu an hnuaia hnathawkte kal leh kal loh ziahna mumal tak vawng turin a chah bawk.

Sorkar thuchhuah chuan 'No Work, No Pay' hian sorkar hnathawk zawng zawng a huam dawn tih a tarlang a, Deputy Commissioners-te hnenah an thuchhuah tihlawhtling tura hma la turin a hriattir nghal a ni. Chief Secretary chuan Administrative Secretary-te, Deputy Commissioner-te leh department hotute zawng zawng chu March 13 hmain sorkar thuchhuah tihhlawhtlin kawnga an hmalak tawhna hriattir turin a ti bawk a ni.