Sikkim eptu pawlin an state-ah President's rule puan duh

Sikkim-a eptu pawl, Sikkim Democratic Front (SDF) chuan state assembly leh Lok Sabha inthlan lo awm turah dik leh ralmuang taka an state-in inthlan a hmachhawn theih nan Sikkim-ah President's rule puan an phut tih an tarlang.

SDF chuan tuna an state boruak awm dan thlirin hlauhna leh tharum thawhna thleng ṭhin chuan inthlanah nghawng a neih an hlau tih an sawi.

Party thupuangtu, MN Dahal chuan thuthar thehdarhtute a kawmnaah Governor leh sorkar laipui hnenah inthlan lo awm tur chu President's rule hnuaia hmachhawn an ngaihna chhan an party chuan an thlen tawh tih a sawi. SDF hotu, Pawan Chamling pawhin March 6, Nilaini khan Govenor hnenah assembly leh Lok Sabha inthlan hma ngeiin an state chu President's rule hnuaia dah a duh thu a lo thlen tawh bawk. Governor hnena memorandum-a theh luhah hian SDF mi leh sa bakah, speaker hlui, KN Rai laka tharum thawhna thleng chhui chian hna chu CBI kuta dah an duh thu pawh a ziak tel a ni.

MN Dahal chuan SDF senior vice president leh speaker hlui ni bawk KN Rai chuan beih a tawk tih sawiin, pawi khawihtute chu man ngei an phut tih a tarlang. Dahal chuan speaker hlui chu New Delhi lamah enkawl mek a ni tih sawiin a dinhmun a ṭha lo hle tih a sawi bawk. SDF lam hian Rai beihnaah hian mi thiltithei tak an inrawlh ngei an ring a, hemi kaihhnawiha man tawkte chu kum lamah an naupang hle tih sawiin KN Rai beitu tak tak an nih chuan anmahni duh thua ti ni loin tihtirtu an awm ngei an ring thu an sawi.