Manipur : Myanmar mi 22 an rama thawn kir an ni

Manipur sorkar chuan an state chhunga dan loa lut, Myanmar mi awmte chu Inrinni khan a vawi hnih nan a thawn kir.

Myanmar mi thawn kirte hi mi 22 niin Imphal, Bir Tikendrajit International airport aṭanga thawn kir an ni. Zirtawpni khan a vawi khatna atan mi pariat chu Imphal airport aṭangin Moreh-ah thawn an ni tawh bawk.

Manipur sorkar hian an state chhunga dan loa lut, Myanmar mi 77 chu a thawn kir leh dawn a, an zingah hian naupang panga leh hmeichhia 55 an awm a ni. Thawn kir hna hi ni li chhunga zawh fel hman beisei a ni. Manipur chief minister N Biren Singh chuan, Zirtawpnia thawn kirte chu a hmasa ber an nih thu sawiin, India chu 1951 Refugee Convention signatory ni lo mah se, Myanmar aṭanga lo lutte chu lo enkawlin, Myanmar buaina avanga lo lutte chu India chuan chhawmdawlna a pe tih a sawi.

Myanmar mi thawn kirte hi ramri hnaiha Moreh khuaah dah niin heta ṭang hian Tamu khuaa Myanmar thuneitute kutah dah an ni. Thuneitu lam chuan raltlante hi Shajiwa Jail-ah dah hran an nih thu leh, an dinhmunte uluk taka enfiah an nih hnua thawn kir leh chauh an nih thu an sawi a ni.