CAA dodalin awmzia a nei lo : Assam CM

Assam chief minister Himanta Biswa Sarma chuan an state chhunga Citizenship Amendment Act, 2019 dodalna awm chuan awmzia a neih loh thu Pathianni khan a sawi.

Assam CM hian India danpui hnuaiah mi tu pawhin dan palzut loin an duh loh zawng dodal theihna an neih chu a hriatpui tih a sawi a, mahse, political party-te chuan CAA dodal nan bandh an huaihawt hmain Gauhati High Court thuchhuah ngaihtuah hmasa phawt tura a duh thu a sawi bawk.

Gauhati High Court hian March 2019 khan thuchhuah siamin bandh eng chi pawh, rel kawng emaw kawngpui emaw dan pawh huam telin, hetiang huaihawt chu dan phal loh a nih thu an lo sawi tawh a ni. He court thuchhuah hmang hian Assam CM hian political party-te chu a vau khan a ni.

Sarma chuan political party zinga court thupek bawhchhia an awm a nih chuan Election Commission of India (ECI) hnenah thupek bawhchhiate chu an hrilh hre zel dawn tih a sawi a, hemi avang hian ECI-a party an ni tih hriatpuina hloh (de-registration) thlengin ECI-in a hrem theih avangin party nawrh huaihawt tumte chu fimkhur turin a chah a ni.

Assam CM hian political party-te chu nawrh leh bandh huaihawt aiin an duh loh zawnga dan siam chu court hnena thlen a hlawk zawk thu sawiin, dan rorelnaah an duh lohna chu thlen turin thurâwn a pe. Sarma chuan Illegal Migrants (Determination by Tribunals) Act, 1983 chu entir nan hmangin, he danin phalna nei loa lutte a humhim avanga Assam state mipuite lungawi lohna chu Supreme Court-ah thlen a nih hnuah court chuan kum 2005 khan he dan hi a hnawl tih sawiin, hetiang kalphunga CAA pawh hi dodal zawk turin political party-te pawh a chah.