Manipur : Rathuam kengte beihna vangin mi 2 thi

Kangpokpi district, Manipur-ah Inrinni liam ta khan ralthuam keng, tu tih hriat lohte'n mi pathum kut an thlak a, mi pahnihin nunna an chan a, pakhat erawhin hliam na tak a tuar a ni.

Thil thleng mita hmutute sawi danin, kut tuar mi pathumte hi ralthuam kengte chuan khawlaiah hnuk kualin kut an thlak zui niin an sawi. Tharum thawhna hi Inrinni tlai lama thleng niin kut tuartu mi pathumte hi Motbung bazar-a dan phal loha truck khalhtute laka pawisa khawn ṭhin nia puh an ni.

Kut tuartu Jaminglal (Kum-38) leh Jaminglel (Kum-38) chu Letpao damdawi in panpui an nih laiin an hliam tuar loin an boral a, Haominthang (Kum-37) chu hliam na tak tuarin damdawi in lamah a awm mek thung a, a dinhmun a ṭha lo hle.

Rathuam nena mi pathum beitute hi eng pawl nge an nih hriat an la ni lo a, Manipur chhunga eng helpawl mahin an thiltihah an la chhal lo. Kut tuar boral an awm avang hian Kangpokpi district-ah chuan boruak a sosang hle a, mipui lungawi lo an ṭhahnem hle. Thuneitu lam chuan mipui lungawi lo avanga buaina chhuak hlauhthawnawm a awm lo nia sawiin, pawikhawihtute zawn hna chu ngawrh takin an thawk mek niin an sawi.

Rathuam thuhruk ṭhahnem tak man a ni

Manipur Police leh Assam Rifle chuan ralthuam dap beihpui an thlak zel a, kar liam ta Inrinni aṭanga chhiarin darkar 48 chhungin Kangpokpi district leh Churachandpur district-ah ralthuam ṭhahnem tak an man leh.

Ralthuam dap beihpui hi Assam Rifles, BSF leh Manipur Police chuan joint operation-in an kalpui a, silai leh a mu bakah puakthei thil ṭhahnem tak an man tel a ni. Rathuam mante hi a neitu hriat an nih loh bakah hemi kaihhnawihah hian mimal man tawk an awm lo bawk. Ralthuam an mante hi police station hnai berah hlan niin, anni hian a ṭul angin hma an la zui dawn a ni.