AP : PM-in Dibang Hydroelectric project siamna tur lung a phum

Prime minister Narendra Modi chuan Mega Watt 2,880 pe chhuak thei tur, Arunachal Pradesh-a Dibang Multipurpose Hydropower Project lungphum a phum. He project hi Lower Dibang Valley district-a awm tur niin NHPC Limited chuan siam hna hi a thawk dawn a, a siamna atan hian Rs. vbc. 31,875 ruahman a ni. A siam hna hi kum kua chhunga zawhfel hman tura ruahhman a ni bawk.

Prime Minister Modi chuan lungphumna hun an hmannaa thu a sawiah, Dibang Multipurpose Hydropower Project atan hian metre 278-a sangin tuikhuah a ngaih dawn avangin India rama tuikhuah sang ber a ni dawn tih a sawi. Hmarchhak chu India rama tuikhuah sang ber ni tur (Dibang dam) leh lei (bridge) sang ber awmna a ni dawn ta tih a sawi bawk.

Dibang tuikhuah hian kawlphetha a pek chhuah bakah tuilian ven nana ṭangkai tura duan a ni a, hemi bakah hian hna tam tak a siam belh dawn a, a chhehvel khuate tan hmasawnna tam tak a thlen thei dawn a ni. Dibang tuikhuah hi India rama Concrete Gravity Dam sang ber a nih dawn bakah Roller Compacted Concrete (RCC) technique hmanga sak a nih dawn avangin khawvela RCC Dam sang ber a ni dawn bawk a ni.