Tripura : District 8-ah infiammite tan 'Youth Hostel' sa dawn

Tripura chief minister Dr Manik Saha chuan a kaihhruai sorkarin Tripura chhunga district pariatah infiammite'n an hman ṭangkai tur 'Youth Hostel' a sak tur thu a sawi.

Chief minister hian 'Madhusudhan Saha Yuba Awas' hawnna hun Pathianni khan neiin hostel sak a nih tur thu hi a puang a, an state chhunga infiammite tan a ṭangkai bakah state pawn lam infiammite pawn thlenna hmun ṭha an neih theih nan a pui dawn a ni, a ti.

Manik Saha chuan an state chhunga infiammite'n harsatna an tawh ṭhin chu a hriatthiampui thu sawiin, Prime Minister Modi kaihhruaina hnuaiah an tum tihlawhtling turin chak takin hma an lak mek niin a sawi. Infiammite chuan zirna leh infiamna an kaihkawp a ṭul chang a awm tih sawiin, chutiang hunah chuan thlenna hmun ṭha an neih ṭhin loh avangin harsatna an tawk ṭhin tih a sawi a, a kaihhruai sorkar chuan chutiang harsatna chu tihbo a tum a sawi bawk a ni.