Meghalaya state sorkar a talbuai
Meghalaya state sorkar chu lungalhthei aṭanga sorkar laipui-a royalty a chhun danah thil felhlel a awm avangin a buai ru hle.
April 17, 2014 atang khan National Green Tribunal (NGT) chuan Meghalaya state sorkar chu an ramchhunga lungalhthei khur dan loa nei chhungkaw eng emaw zat an awm avang leh royalty a pek ṭhat loh avangin a chungah hremna a lo lek tawh. NGT hian lungalhthei laihchhuah leh thawn chhuah te chu a khuahkhirh sak a, hei hian nasa takin an state economy a nghawng mek.
Tun hnai khan NGT chuan Meghalaya state sorkar hnenah hian hriattirna a pe chhuak leh tawh a, May 15 hnu lamah chuan lungalhthei thawn chhuak tawh lo turin a hriattir.
Mining and Geology depart-ment official chuan Union Coal ministry-in state sorkar laka Coal Mines Nationalization Act, 1973 a hman mek chu siam ṭha turin a lo ngen tawh. Tuna dan hman lai mekah chuan state coal mine te chu state sorkar chuan thuneihna nei ve bawk mah se sorkar laipui chuan thuneihna sang tak a nei a ni. Mines and Minerals (Development and Regulation) Amendment Act, 2015 chu Meghalaya-ah hian hman a ni a, hei hi siam ṭhat a ṭul thu a sawi. Official chuan Coal Mines Nationalization Act, 1973 leh Mines and Minerals (Development and Regulation) Amendment Act, 2015 chu siam ṭha turin State Assembly chuan a pass tawh a, nimahsela he dan hi president rem tihna lo chuan sorkar laipui chuan Meghalaya-ah hian a hmang thei lo niin an sawi. State sokar Councel leh Supreme Court lawyer Ranjan Mukherjee te chuan Union Coal ministry hnenah pawmpui turin an thlen a, tun thlengin tihkhawtlai a la ni.
National Green Tribunal-in Meghalay a hrek avang a state sorkar sum hloh chu vaibelchhe 600 vel nia chhut a ni a, heta
ṭanga state sorkarin royalty a chhun tur chu vaibelchhe 800 vel a ni. State sorkar hian NGT hnenah hian lungalhthei lak chhuah sa chhek khawl awm mek chu fur thlen hma ngeia thawn chhuah phalsak turin a lo ngen tawh a, sum tam tak an hloh dawn bakah, an rama lui te chu a bawlhlawh dawn niin an sawi. Nimahsela NGT hian May 15 hnu lamah chuan heng lungalhthei te hi khawih chet a remti tawh dawn lo tih a hriattir thung.