Assam inthlanah vote a tla ṭhat

Assam chuan an state din tirh ata inthlana vote tlak ṭhat ber ṭum a tawng.

Kum 1985 khan Assam state election-ah vote 79.21% a tla a, hun rei tak chhung an khum theih loh hnuah kum 2016 state election-ah he record hi an khum ta. Kumin inthlan hi thawh khatna leh thawhnihna-ah ṭhen a ni a, a pumpuiah hian vote 84.72% lai a tla a ni. Mi tam tak chuan helpawlin inthlan chawhbuai an tum thu an sawi avang te, boruak a ralmuang tawk loa an hriat avangin vote tla zat hi a san vak an ring lo. Mahse venhimna khauh taka kenkawh a nih avangin mipuite chuan boruak nuam tak hnuaiah an aiawh an thlang thei a ni.

Assam-ah hian inthlan neih a nih tawh chinah vote a tla chhe ngai meuh lo a, kum 1985 hnu lamah phei chuan vote tla hi 75% aiin a chhe ngai lo. Kumin bikah a thawh khatna-ah khan 82.20% lai a tla a, hei hi a thawh hnihna chuan rawn khum ve lehin vote 87.03% a tla. Golapara-a Jaleswar LAC chu vote tlak ṭhatna ber niin 93.53% a tling phak. Hetih lai hian vote tlak chhiat berna Cachar district-a Silchar LAC-ah chuan 75.05% a tla thung a ni. Party hrang hrang hruaitute chuan inthlan zawhfel a ni ta chu lawmawm an tih thu leh harsatna leh buaina lian tham thleng loa zawhfel a ni ta chu thil chhinchhiah tlak a nih thu an sawi.