Pá eisual vangin mi panga thi

Meghalaya state-a East Khasi Hills-ah pá eisual vangin mi panga an thi a, pá eisual zinga mi Synsharlang Dewkhaid chu Shillong Civil Hospital-ah dahluh a nih hnuin Thawhlehni khan a boral ve leh. Health Minister A.L. Hek chuan mipuite chu fimkhur turin a chah.

Health Minister chuan, "April 6 khan Mawsawa-ah pá eisual an awm tih report kan dawng a, a hnu April 8 khan Nongpriang-ah pá eisual an awm ve leh tih report kan dawng a ni", a ti. Mawsawa-a pá eisual te hi chhungkua an ni a, Remdor Rapthap (20), chhungkaw pa ber Synsharlang Dewkhaid bakah nu ber Darisda Rapthap te bakah midang pahnih te chuan nunna an chan. An chhungkaw hi pakua an ni. Pá ei sual te hi an khua a sik bakah an vai hian a tukah hian engmah an hre mumal lo zui nghal niin an sawi.

Dam chhuak zinga mi Rapthap chuan pá ‘tit Kur Miaw’ an tih mai chu an ei fo tih a sawi a, tuna an ei sual tak pawh hi ‘tit Kur Miaw’ tho niin a sawi. Ganesh Das Hospital leh Shillong Civil Hospital ah enkawl an ni. Rida Dewkhaid chu a dinhmun a ṭha lo hle a, Ilapynshai Rapthap leh Daiarlang Rapthap te erawh an ngaihtuahawm tawh lo. Health Minister A.L. Hek chuan, thihna thleng chu pawi a tih thu leh fimkhur a ṭul thu a sawi.