Tuilian-in Arunachal Pradesh a tibuai

Arunachal Pradesh-ah chuan kar kalta aṭang khan ruah nasa takin a sur a, hmun hrang hrangah mipuiten harsatna an tawk mek.

Changlang town leh Anjaw district-ah te chuan tuilian avangin kawngpui eng emaw zat a ping a, inkalpawhna a buai phah hle.

Ruah hi a sur chhunzawm zel avangin harsatna lian zawk a thlen mai theih thu thuneitu lam chuan an sawi. Tui lian hian CC pavement siam mek PK point leh SP office inkalpawhna chu a tichhe hneh hle a, hei bakah hian PHED leh Agriculture hmun bul vel te chu a ralmuang lo hle. Tui lian hian hmun hrang hrangah harsatna a thlen thu report an dawn belh zel a, report-a tarlan a nih dan chuan Margherita - Changlang kawng chu hmun tam takah a chhia a, kal tlang theih lohin a awm mek.

Tui leh eng pek chhuah kawngah harsatna an tawk ṭan mek bawk. Anjaw Deputy Commissioner chuan, Anjaw District hmun tam takah kawngpui kal tlang theih loin a awm mek a, siam ṭhat hna thawh mek a ni, a ti. Tidding - Chiquinty chu kal theih tura siam ṭhat a nih tawh thu leh hmun dang pawh lirthei chi tin kal tlang theih a siam thuai a ni tur thu a sawi. Hetih lai hian thil man sang khuahkhirh a nih theih nan hmalak reng a ni a, hei hian mipuite harsatna nasa takin a chhawk a ni. Hriat theih chinah tuilian vang hian nunna chan an awm lo.