Tarun Gogoi lakah thubuai thehlut

Assam Chief Minister Tarun Gogoi chuanThawhṭanni khan press conference a ko a, Election Commission hriattirna palzut avangin a lakah FIR thehluh nghal a ni.

Election Commission chuan Gogoi chu press conference ko lo turin hriattirna an pe a, model code of conduct bawhchhiatna a nih thu an sawi. Gogoi-a lakah hian Kamrup district election officer chuan Dispur police station-ah thubuai a thehlut a, Representation of the People Act section 126 a bawhchhia niin a tarlang a ni. lnthlan neih a nih aṭanga darkar 24 ral hmaa media-a inthlan kaihnawih sawichhuah e maw tarlan chu dankalh a ni. Chu chu Gogoi hian bawhchhia-in inthlan thawh hnihna neih ni klhan press conference a ko a, a lakah hian thubuai ziah luh a ni ta a ni.

Press conference-ah hian Gogoi chuan BJP chu a bei niin tarlan a ni a, election commission chuan an hna an thawk ṭha tawk lo niin a sawi bawk.

CM chuan press conference neih hma hian dan hre mi a rawn tih a sawi a, dan a bawhchhe lo niin a sawi ve thung. BJP hruaitu ṭhenkhat chuan model code of conduct chu ualau takin an bawhchhia niin a sawi bawk a, EC chuan an chungah hian hremna a lek kawh lo niin a sawi.

Hetih lai hian BJP lam chuan thu chhuah an siam a, Gogoi chuan dan a bawhchhiat ngei thu leh Election Commission chu Gogoi-a lakah hian hremna pe ngei turin an nawr ve thung. BJP leh congress inbeihna hi a nasat em avangin an boruak hi a dam mai dawn lo niin a lang.