Assam hmun hrang hrangah CAA dodalna lantir chhunzawm zel

Sorkar laipuiin Citizenship Amendment Act (CAA) hman ṭan a nih tur thu a puan hnuah, hmarchhak state zinga thawm nei ring ber Assam chuan CAA dodalna an lantir chhunzawm zel.

Assam huam chhunga pawl hrang hrang zingah CAA duh lohna lantir nan nawrh mai duh tawk loin court hial thleng an awm a ni. All Assam Student's Union (AASU) chuan CAA dan zam ziahna lehkhapuan chu Tangla khuaah an hal ral a, Asom Jatiyatabadi Yuba Chatra Parishad (AJYCP) chuan prime minister leh union home minister lim an hal bakah CAA copy an hal ral ve bawk.

State khawpui Guwahati-ah pawh college zirlaite chuan zirna in tualzawlah CAA an duh lohna an lantir a, B Barooah College zirlaite'n kawng zawh an tum chu Police lamin lo dangin zirlaite nen hian an innawr buai zui a ni. Jorhat district-a lawyer-te chuan thuziak kengin CAA an dodalna an lantir a, Sivasagar khuaah Krishak Mukti Sangram Samiti (KMSS) chuan kawng zawh an huaihawt bawk a ni.

Assam chief minister, Himanta Biswa Sarma chuan CAA duh loh vanga lungawi lote chuan nawrh leh kawng zawh huaihawt ai chuan court lama an lungawi lohna an thlen ṭha a tih zawk thu a sawi. Sarma chuan CAA duh lotute chuan mi eng zatin nge CAA hman a nih vanga India khua leh tui nihna nei dawn tih chu an rindan bak sawi ngaihna an hriat loh thu a sawi a, CAA-in khua leh tui nihna a pek zat chu a la chiang thuai dawn a, dodaltute chu dawhthei taka nghak tura a duh thu a sawi bawk. Assam CM hian National Register of Citizens (NRC) hnuaia tel lo mi pakhat pawh khua leh tui nihna pek a nih chuan banna a theh luh hmasak ber tur thu a sawi bawk.

Congress MLA leh Assam legislative assembly-a leader of opposition ni bawk, Debabrata Saikia chuan Supreme Court-ah Citizenship Amendment Rules, 2024 chu hmang rih lo turin ngenna a thlen. CAA chuan India danpui Article 14 a kalh bakah Assam Accord-a inremna neih tawh chu a bawhchhiat thu sawiin, CAA chu dan thlei bik nei a ni, a ti.