Zirna tihhmasawn nan AI hman a ni dawn : Tripura CM

Tripura chief minister, Dr Manik Saha chuan an state chhunga zirna tihhmasawn nan Artificial Intelligence (AI) chu zirlaite kaihhnawih thil hrang hrang en fiah nan hman a nih dawn thu a sawi.

Chief Minister hian state chhunga Vidya Samiksha Kendra (VSK) hmasa ber hawnna a neih ṭumin he thu hi a sawi a ni. AI hmang hian zirlaite data, sikul an kai dan (attendance) leh zirna inte'n result an siam ṭhin dan en fiah an tum tih a tarlang.

Saha chuan prime minister Modi chuan mipuite tana awlsamna thlen turin sorkar inrelbawlnaah, khawl thiamna hmang ṭangkai turin a fuih ṭhin thu a sawi a, a kaihhruai sorkar pawhin PM duhdan tihhlawhtlin an tum tih a sawi. Saha hian VSK hnuaiah ramchhunga zirlai vaibelchhe 13 chuang an inziah luh tawh thu sawiin, he hmalakna hian zirna kawnga hmasawnna thlen chu a tum ber a ni, a ti.

Education department hotute chuan VSK model sawi fiahin, AI thiamna hmanga thuam a nih thu an sawi a, zirlaite sikul kai dan leh tihṭhat dan lak khawm chu AI hmangin an hmasawn dan teh nan hman ṭhin a ni dawn tih an sawi. Hemi bakah hian AI thiamna hmangin sikul kalphungte chu vil an nih dawn thu leh, zirna kalphunga a fel lo lai rang taka hriat chhuah a nih theih nan hman a ni dawn niin an sawi.