Nagaland khawchhak lamah ENPO-in 'public emergency' puang

Eastern Nagaland People’s Organisation (ENPO) chuan Nagaland chhunga rorelna hran an ngiatna kal zelah tun kar tir aṭang khan 'public emergency' an puang. ENPO-in emergency an puan chhan hi sorkar laipuiin Nagaland khawchhak lama chengte tana rorelna hran pekna tur a tihkhawtlai vang a ni.

ENPO hian Nagaland state khawchhak lam district paruk huam chin chu ṭhen hrana 'Frontier Nagaland Territory' siam an ngiat a ni. Sorkar laipui chuan an thil ngiat tihlawhtling tura hma a lak chak tawk loh avangin emergency hi an puang a, bandh-te huaihawt niin helai huam chhunga cheng mipuite nunphung a khaihlak phah hle.

Thawhlehni khan Tuensang khuaah ENPO, tribal hotute leh tlawmngai pawl hrang hrang-te'n an kal zel dan tur an ngaihtuah a, an thil tum a hlawhtlin hma chu 'public emergency' kalpui chhunzawm zel turin thutlukna an siam a ni. ENPO president Tsapikyu Sangtam chuan an thil phut thlawp turin mipui zawng zawng a sawm a, rorelna hran an ngiat chu tun dinhmunah an tana pawimawh ber a nih thu a sawi.