Manipur : Tharum thawhna thleng chhui chianna theh lut turin Supreme Court-in CBI, NIA leh Manipur sorkar a hriattir

Supreme Court chuan Central Bureau of Investigation (CBI), National Investigation Agency (NIA) leh Manipur sorkar-te chu Manipur-a hnam pahnih inkara buaina chhuak avanga thubuai ziah luh tawh an chhui chianna leh thlen chinte court-a theh lut turin a hriattir. Hei hi court-in thubuai a ngaihtuah mekte Assam-ah nge Manipur-ah ngaihtuah chhunzawm zel tur tih chungchanga thutlukna a siam duh vang a ni.

Manipur buaina chungchang, Manipur chhunga ngaihtuah ṭhin chu Assam, Guwahati lama sawn dilna a awm a, hei hi Supreme Court chuan a ngaihtuah a ni. Manipur sorkar aiawh, Additional Solicitor General Aishwarya Bhati chuan buainain ziaawm lam a pan chhoh leh mek avangin thubuai chu Manipur-a ngaihtuah chhunzawm a duh thu a sawi a, Supreme court chuan buaina chhui chian kawnga an thlen chin a dil ta a ni. Nikum August khan Manipur buaina kaihhnawiha thubuai eng emaw zat chu SC hian Assam lama ngaihtuah chhunzawm turin thu a lo ti tlu tawh a, heng zingah hian hmeichhe pahnih chunga mawi lo taka chetna video darh kaihhnawih thubuai pawh a tel.

Chief Justice, D Y Chandrachud, justice pahnih JB Pardiwla leh Manoj Misra-te chuan Manipur buaina chuan ziaawm lam pan thei loin, dan leh thupek kenkawh kawngah hlawhchhamna tam tak thleng mah se, Manipur-a dan rorelna a awm leh theihna atan court chuan tih theih a nei tam lo tih an sawi. Dan leh thupek kenkawh chu state sorkar mawhphurna a ni, an ti. Supreme Court hian March thla tawp aṭangin Manipur buaina kaihhnawiha petition lut hrang hrangte a ngaihtuah ṭan tawh dawn a ni.