Manipur : UNLF-P hruaitu man vangin lungawi lohna lantir

National Investigation Agency (NIA) chuan Manipur khawpui, Imphal West district-ah helpawl pakhat, United National Liberation Front - Pambei (UNLF-P) hruaitu pathum an man. Hei vang hian lungawi lohna lantirin mipui an pung khawm zui a ni.

UNLF-P hruaitute man an nih avang hian mipui lungawi lote chuan Nilaini khan kawngpui an dang a, pung khawm zinga a tam zawk chu hmeichhia an ni. NIA chet dan an duh lohzia lantir nan Imphal hmar lama dawr leh sumdawnna hmunte chu khar vek a ni bawk.

NIA hian state leh central force puihnain helpawl dap hna hi an kalpui a, Imphal West-ah hian venhimna pawh an uluk hle. Hetianga hma an lak avang hian UNLF-P hruaitu pathumte hi an man theih phah a, an zingah hian helpawl sipai hotu Thokchom Thoiba leh chief intelligence in-charge, Ingba pawh a tel. Helpawl mi leh sa an mante hi Indian Air Force thlawhtheihnain, Imphal aṭangin Delhi lamah thawn thlak nghal an ni.

UNLF-P hi Meitei helpawl niin Imphal phairuama chetla ṭhin an ni a, Manipur ram ropuina atana beitu niin an inchhal a ni. Sorkar laipui nen remna zawnga an inbiak mek avangin ṭhenkhat chuan an hruaitute hi man ni loin, inbiakna neihpui tura Delhi lama thawnthlak an nih zawk an ring thung.